Dağlıq Qarabağ qurbanları Azərbaycanın şəhərində dəfn olundular – qaçqınlar Ermənistan hücumları nəticəsində yüzlərlə insanın öldüyünü deyir

The Washington Post, 28 fevral 1992-ci il

Tomas Qoltz, Ağdam, Azərbaycan, 27 fevral

Dağlıq Qarabağın müharibə zonasının şərqində yerləşən şəhərin baş məscidinin rəsmilərinin bildirdiyinə görə Ermənistan silahlı qüvvələ­ri­nin çərşənbə günü ələ keçirdikləri müharibə zonasındakı Azərbay­canın şəhərindən gətirilən 27 cəsədi bu gün dəfn ediblər.

Anklavın paytaxtı Stepanakertdən şimal-şərq məsafədə yerləşən 6000 nəfərlik Xocalıdan qaçan qaçqınlar qadın və uşaqlar da daxil olmaqla 500-ə qədər insanın hücum zamanı öldürüldüyünü iddia edir­lər. Bu şəraitdə nə qədər insanın öldüyünü təxmin etmək mümkün deyildi. Ağdam məscidinin rəsmisi Səid Muan oğlu Sadıqov deyir ki, çərşənbə günündən etibarən qaçqınlar məsciddə 477 Xocalı faciə­sinin qurbanının adını qeydiyyatdan keçirmişlər.

Azərbaycanın paytaxtı Bakıdakı rəsmilər Xocalıda ölənlərin sayının 100-ə çatdığını, paytaxt Yerevandakı Ermənistan rəsmiləri isə hücum­da yalnız iki azərbaycanlının öldüyünü bildirib. Bakıdan olan bir mə­mur burada dedi ki, onun hökuməti qorxur ki, azərbaycanlılar neçə nəfərin öldürüldüyünü bilsələr, hökumətə qarşı çıxa bilərlər.

Bu gün burada 7 cəsəd var idi, onların ikisi uşaq, üçü isə qadın idi, bir nəfərin yaxın məsafədən sinəsinə açılan atəş nəticəsində öldüyü görünür. Çoxu bıçaq zərbəsindən yaralanan digər 120 qaçqın isə Ağ­dam xəstəxanasında müalicə olunur.

Ağdama çərşənbə günü gecə gələn Raisə Aslanova ermənilərin çər­şənbə axşamı Xocalıya hücum edən zaman “ancaq atəş açdıqlarını, aramsız olaraq atəş açdıqlarını” deyir. O, həyat yoldaşının və qaynının öldürüldüyünü, qızının isə itkin düşdüyünü dedi.

Dağlıq Qarabağın dağlıq ərazisindən bura gələn qaçqınlar sırasında erməni gizirlərinin onları ″müsəlman olduqlarına″ görə döydüyü üçün hərbi hissəni cümə günü tərk edərək Xocalıya sığınan keçmiş SSRİ Daxili İşlər Nazirliyi qüvvələrinin iki nəfər türkmən əsgərləri də var idi.

Fərarilər xidmət etdikləri 366-cı alayın Xocalını ələ keçirən Ermə­nis­tan silahlı qüvvələrinə dəstək göstərdiyini bildirir. Onlar qadınlara və uşaqlara xilas olmağa kömək etdiklərini deyirlər. ″Bir qrup insanı dağ­ların arası ilə keçirərkən ermənilər bizi tapıb atəş açmağa başla­dılar″, fərarilərdən biri Ağamehmet Mütif dedi. ″On iki nəfər öldürüldü″.